Hajatan Gede Pilkada DKI 2012 Sebuah Renungan Buat Calonnya

Sekedar unek-unek Ane selaku  warge Jakarte. Ane denger-denger nih besok kan waktunya kite warge Jakarte mao ade hajatan  gede, kan ?  betul kaga? Laaa dah die pade melongo ... kaya ayam ngenelen karet gelang lima puluh biji ... Laaa beneran kan . Ya udah besok tuh tanggal berape ya... oooh iye.. tanggal 11 Juli yee heeeh 2012 hari Rebo. Naaah ntu ..besok pagi laaah kite pade siap-siap daah pade bebenah tuh di rumah masing-masing buat ngenyiapin acara hajatan besok ... Laah calon penganten.. eeeh cagub ame wagub  udeh pade siap-siap nungguin kite-kite pade kondangan.. eah  kondangan maksud ane nyoblosss di hajatan gede besok. Encang, encing, Enyak, Babe, engkong, ame semuanye dah para tetangge kite laaa... bukan Cuma warge nyang aseli betawi doang nyang kondangan ...ealahh kondangan lagi maksud ane nyoblosss..... lah semuanye warge Jakarte dah .. bae ntu nyang asalnye dari suku jawe, sunde, ambon, batak, dayak, badui, kalimantan, sulawesi,  suku mane aje pokoknye kalau emang pade tinggal dan mukim di mari  dan name ente semuanye ke date ame petugas pilkade ... laah kudu dateng besok mah kaga boleh ngedekem bae di rumeh kaya kucing sakit  heee... Ayo dah kite suksesin  pilkade DKI besok yee.

Tapi yee ... ngomong-ngomong hajatan gede besok, ane mau mastiin dulu nih siape aje sih nyang bakal besaing ngerebutin kursi nomor 1 di DKI Jakarte ini. Ente pade tau kage .. siape aje emang mereka ???... Laaah .. jangan pade bengong begitu nape ... lah jeleeek banget dah muke ente romannye . Katenye mau pilih orang buat jadi pimpinan... loh koq malah kaga tau siape nyang mau dipilih. Nyang mane orangnye juga kaga tau ... visi misinye buat mau jadi gubernur DKI aje juga kaga tau ... lahhh gimane urusannye nih pade. Lah ente semuanye jangan kaya orang bego nape... jangan mau beli kucing dalam karung dong ... nyang kite sendiri kaga tau itu isinye bae apa kaga... kite jadi pembeli juge kudu cerdas ... hari gini ... jangan mau dikibulin. Lah hampir kira kira satu bulan ntuh udah banyak gambar-gambar para pasangan cagub ame wagub pade mejeng di tempat-tempat umum. 

Mulai dari baleho, pamplet, brosur, lihat aje hampir di semua sudut Jakarte ade gambar mereka. Ampe pade nangkring di pohon-pohon segale, heeee para penghuni pohon jadi ngungsi deh gara-gara ade penghuni baru ... huuuh ade-ade aje. Di sisi jembatan layang, tiang listrik, tembok-tembok, ampe di wc umum juge ade... iiih jijik kaye udah kaga ade tempat aje. Laaah ntu mah kan kerjaannya tim sukses atau simpatisan pasangan cagub ame wagub. Lahhh ente tanggung jawab nape bersihin lagi ntu gambarnye jangan pade nyampah aje ente kerjaannye. Katenye mau jadiin Jakarte nyang nggak berkumis. Apa tuh artinya berantakan, kumuh dan miskin apa katanye... tapi kalau belum kepilih ajee udah ngebuat Jakarte semrawut dan kotor dengan gambar-gambar pasangan cagub ame wagub padahal udah waktunya harus dibersihin ternyata belum juga dibersihin ... laah sama aje ente pade ngenyumbang Jakarte  jadi tambah berantakan, kumuh dan miskin. Lahhh nyang kayak begini nih mah buat ane kaga kepake buat jadi pimpinan di mari. Mending di rumah bae ngurusin keluarge anak ame tetangge ente di sono... siape aje dah nyang masih punye rase, nyeng lihat gambarnye masih pade nempel di tempat umum dan nambah jelek kote Jakarte. Ini baru hal kecil ... benahin gambarnye sendiri aje lah jangan bicare tim sukses buat ngemenangin jabatan gubernur. Teruus enggak usah janji muluk-muluk buat warge Jakarte, dengan tempo sesingkat-singkatnye bisa buat Jakarte Bebas dari kumuh, miskin, banjir, dan macet. Laaah semuanye pade omong doang gede... kite mah warge Jakarte Cuma perlu bukti ... bukan janji. Nyang penting kalo ujan ane kaga keujanan, kalau panas kage kepanasan, dan punye tempat tinggal nyang layak, pendidikan murah... Ingat .. Ingat ... Ingat... Setiap ucapan Kalian sewaktu kampanye adalah utang yang harus kalian bayarkan di hadapan Allah SWT......

Nih.. lagi Jakarte udah sumpek banget ... polusi udare, asep knalpot kendaraan bermotor, ,panas, banjir, macet ya sudahan kaga usah diomongin lagi dah.  Coba dah tuh nyang kemarin pade bekoar-koar mau perbaiki Jakarte Cuma 3 tahun doang bisa beresss ... eaalaah die kirain siape die ...Harry Potter, Aladin,Mak Lampir, Mbah Dukun, Nenek sihir, nyang cuman bilang sim salabim, alakazam, abakdabra, baca mantra, sembur, baca ajian ... langsung beresss... Astaghfirullaahal’azhiim.

Tapi yah sudahlah ane sih warge betawi, lahir di betawi, ane cinta ame betawi... ane pengeen banget punye pimpinan nyang ngerti ame warge pribumi... Ane kangen ame keadaan, situasi, dan kondisi Jakarta nyang seperti tempo dulu... nyang warganye pade akur, ramah-tamah, udarenye seger... nyeng suasane keislamannye masih alami... dimane setiap pagi, dan sore tiap rumah masih banyak suara anak, ibu, ayah pade mengaji. Duuuuh kangenye ame suasane nyang kaya begitu. Bisa kaga ye Jakarte kaya dulu lagi. Ya .. ane mau punye pemimpin yang agama Islamnye kuat, Ibadahnye rajin, ngerti ame warge betawinye...tau seluk beluk tentang Jakarta, dan yang jelas udah berpengalaman. 

Buat ane menjadi pemimpin Jakarta nggak boleh main – main atau coba-coba. Harus nyang berpengalaman. Untuk itu ane Bismillahirrohmaanirrohiim dari ke 6 pasangan Calon Gubernur dan wakil gubernur Periode Tahun 2012/2016 :

1.  Fauzi Bowo – Nahrowi
2. Hendardji – Riza
3. Jokowi  -  Basuki
4. Hidayat NW – Didik JR
5. Faisal Basri – Biem Benyamin
6. Alex Nurdin – Nono Sampono

Ane akan pilih ........ Tobe continue... Lihat Jawabannya besok di TPS tempat ane nyoblossss.

Heeee... Selamat atas terpilihnya pasangan cagub dan wagub yang terpilih sebagai pemenang pilkada besok.

Ane berdo’e semoge kegiatan pilkada DKI besok berjalan lancar dan melahirkan Pemimpin Jakarta yang benar-benar mengerti akan kebutuhan warganye. Aamin Yaa Robbal ‘aalamiin.

Kalau ada ucapan yang kurang berkenan ane mohon maaf... ini tidak bermaksud untuk menyinggung atau menhina atau menyakiti salah satu pasangan atau pun para simpatisannya. sekedar ruang ekspresi ane aje.  

Wassalam.

Artikel Terkait